ඓතිහාසික හා සංස්කෘතික මෙන්ම ආගමික වශයෙන් සුවිශේෂී වැදගත්කමක් උසුලන රාගම, තේවත්ත ලංකා අප ස්වාමිදූගේ බැසිලිකා දේවස්ථානයේ වත්මන් තත්ත්වය පිළිබඳ සොයා බැලීම උදෙසා බුද්ධශාසන, ආගමික හා සංස්කෘතික කටයුතු අමාත්‍ය ආචාර්ය හිනිදුම සුනිල් සෙනෙවි මහතා සහ විද්‍යා හා තාක්ෂණ අමාත්‍ය මහාචාර්ය ක්‍රිෂාන්ත අබේසේන මහතා පසුගියදා (මැයි 20) විශේෂ නිරීක්ෂණ චාරිකාවක නිරත වූහ.දේවස්ථානයේ වත්මන් පරිපාලන භාරකරු අතිගරු රවීන් සඳසිරි පෙරේරා පියතුමන් විසින් කරන ලද ආරාධනයකට අනුව මෙම නිරීක්ෂණ චාරිකාව සංවිධානය කර තිබිණි.1911දී ඉතා කුඩා සිද්ධස්ථානයක් ලෙස ආරම්භ කළදවර්තමානයේ දක්නට ලැබෙන බැසිලිකා දේවස්ථානයේ ඉදිකිරීම් කටයුතු ආරම්භ කරන ලද්දේ 1951 වර්ෂයේදීය. ඒ, එවකට අගරදගුරු අති උතුම් තෝමස් කුරේ කාදිනල් හිමිපාණන්ගේ මූලිකත්වය හා මඟපෙන්වීම යටතේය.කතෝලික බැතිමතුන්ගේ පමණක් නොව, විවිධ ආගම් අදහන සමස්ත ශ්‍රී ලාංකික ජනතාවගේම නොමද ගෞරවාදරයට පාත්‍ර වූ මෙම පූජනීය ස්ථානය, අනුහස් සහිත පූර්ණ සිද්ධස්ථානයක් ලෙස ජනතාව අතර මහත් ප්‍රසිද්ධියක් උසුලයි. මෙහි දක්නට ලැබෙන සුවිශේෂ හා අලංකාර ගෘහ නිර්මාණ ශිල්පීය රටාවත්, නෙත් සිත් ඇදගන්නා පාරිසරික සුන්දරත්වයත් හේතුවෙන් දේශීය මෙන්ම විදේශීය සංචාරකයන්ගේද සුවිශේෂ ආකර්ෂණයක් මේ වෙත හිමිව ඇත. එබැවින් මෙම පූජා භූමිය ශ්‍රී ලංකාවේ විවිධ ජනවර්ග එකිනෙක යා කරන ජාතික සමගියේ කේන්ද්‍රස්ථානයක් ලෙස හැඳින්වීම නිවැරදිය.දීර්ඝ කාලයක සිට මෙරට ආධ්‍යාත්මික සුවය උදෙසා ඉමහත් මෙහෙවරක් ඉටුකරන මෙම ඓතිහාසික දේවස්ථාන ගොඩනැඟිල්ල මේ වන විට කඩිනම් අලුත්වැඩියාවන් සිදුකළ යුතු තත්ත්වයක පවතී. ඒ පිළිබඳව පියතුමන් ඇතුළු පාලක මණ්ඩලය පෙන්වා දුන් කරුණු සලකා බැලූ අමාත්‍ය හිනිදුම සුනිල් සෙනෙවි මහතා, දේවස්ථාන පරිශ්‍රයේ සංචාරය කරමින් එහි වර්තමාන තත්ත්වය නිරීක්ෂණය කළේය.මෙම ජාතික හා ආගමික උරුමය මතු පරපුර උදෙසා සුරක්ෂිත කර තැබීමේ වැදගත්කම අමාත්‍යතුමාගේ අවධානයට ලක්විය.මෙම අවස්ථාව සඳහා ප්‍රවීණ මාධ්‍යවේදී නුවන් ලියනගේ මහතා, දේවස්ථාන පාලක මණ්ඩලයේ පියතුමන්ලා, ප්‍රදේශයේ දේශපාලන අධිකාරියේ නියෝජිතයෝ සහ බැතිමත්තු පිරිසක්ද සහභාගිවී සිටියහ.