පුනර්ජනනීය විදුලි ආයතන 391 කට කෝටි 2,500 ක පොලු: ආණ්ඩුවේ අසාර්ථකත්වයෙන් සංවර්ධනය අඩපණයි: සංචාරක කර්මාන්තයත් බිඳවැටෙයි – මධ්යම පළාත් මහ ඇමැති ධුරයට සූජීව සේනසිංහ සූදානම්!
“ජනතාව මත අධික බදු බර පටවමින් රට හොරුන්ගේ පාරාදීසයක් කළ ආණ්ඩුව, අධිකරණයේ ස්වාධීනත්වයටත් අත තබයි – 23 වැනිදා සවස 4.00 ට සියලු බලවේග කොළඹට!”
වත්මන් ආණ්ඩුවේ දැක්මක් නැති පාලනය සහ අසාර්ථක කළමනාකාරිත්වය හේතුවෙන් මුළු රටේම සංවර්ධන හා ආයෝජන ව්යාපෘති සම්පූර්ණයෙන්ම ඇනහිට ජනතාව දිනෙන් දින දැඩි දුප්පත්භාවයට ඇද වැටෙමින් පවතින බව පාර්ලිමේන්තු මන්ත්රී සූජීව සේනසිංහ මහතා සඳහන් කරයි.
ඊයේ (21) සමගි ජන බලවේග ප්රධාන කාර්යාලයේ පැවැති විශේෂ මාධ්ය හමුවකට එක්වෙමින් මන්ත්රීවරයා අනාවරණය කළේ, රටේ සංවර්ධනය වෙනුවෙන් කිසිදු තිරසාර පියවරක් නොගන්නා ආණ්ඩුව පසුගිය රජයන් සිදුකළ ව්යාපෘතිවල තීන්ත ගෑමට පමණක් සීමා වී ඇති බවයි.
බිලියන 100 ක ගල් අඟුරු වංචාවක් – විදුලි ක්ෂේත්රය අගාධයට
ලංකා විදුලිබල මණ්ඩලය වර්තමානයේ මුහුණ දී සිටින දැවැන්ත අර්බුදයට සහ පාඩුවට ප්රධානතම හේතුව ආණ්ඩුව යටතේ සිදුවූ මහා පරිමාණ ගල් අඟුරු වංචාව බව හෙළි කළ සේනසිංහ මහතා, එමගින් පමණක් සිදුව ඇති පාඩුව රුපියල් බිලියන 100 ක් (කෝටි 10,000 ක්) තරම් විශාල බව පෙන්වා දුන්නේය.
තවද, රටේ පුනර්ජනනීය බලශක්ති ක්ෂේත්රය සම්පූර්ණයෙන්ම අඩපණ කරමින්, එම ක්ෂේත්රයේ ආයතන 391 ක් සඳහා ගෙවීමට ඇති රුපියල් බිලියන 25 ක (කෝටි 2,500 ක) හිඟ මුදල් පවා ආණ්ඩුව තවමත් ගෙවා නොමැති බවත්, මේ හේතුවෙන් එම ආයතන වැසීයාමේ තර්ජනයකට මුහුණ පා සිටින බවත් මන්ත්රීවරයා අවධාරණය කළේය.
• ගල් අඟුරු වංචාවෙන් සිදු වූ පාඩුව : රුපියල් බිලියන 100 (කෝටි 10,000)
• පුනර්ජනනීය ආයතන 391 ට හිඟ මුදල් : රුපියල් බිලියන 25 (කෝටි 2,500)
වංචාකරුවන්ට රැකවරණය – ජාත්යන්තරය සමග හොර ගිවිසුම්
මහ බැංකු වංචාව, රක්ෂණ සංස්ථාවේ වංචාව, ශ්රී ලංකා ගුවන් සේවයේ වංචාව සහ ගල් අඟුරු වංචාව ඇතුළු මහා පරිමාණ දූෂණයන්ට එරෙහිව කිසිදු නීතිමය පියවරක් ගැනීමට ආණ්ඩුව කටයුතු කර නැති බවත්, ශ්රී ලංකාව හොරුන්ගේ පාරාදීසයක් බවට පත්වීම නිසා විදේශ ආයෝජකයන් මෙන්ම සංචාරකයන්ද පැමිණීම නතර වී සංචාරක කර්මාන්තය මුළුමනින්ම බිඳවැටී ඇති බවත් හෙතෙම කියා සිටියේය.
එමෙන්ම ජාත්යන්තරයට එරෙහිව ප්රසිද්ධියේ කතා කරන වත්මන් ජාතික ජන බලවේග ආණ්ඩුව, ඇමරිකා එක්සත් ජනපදය සහ ඉන්දියාව වැනි බලවත් රටවල් සමග රටට රහසින් හොර ගිවිසුම් අත්සන් කරමින් සිටින බවටද මන්ත්රීවරයා බරපතළ ලෙස චෝදනා කළේය. GSP+ සහනය සහ IMF වැඩපිළිවෙළ පවත්වාගෙන යාමට ජාත්යන්තර සබඳතා අත්යවශ්ය වුවද, ආණ්ඩුවට ඒ පිළිබඳ කිසිදු නිසි ප්රතිපත්තියක් හෝ පැහැදිලිභාවයක් නැති බවද පැවසීය.
අධිකරණයට හස්තය තැබීමට එරෙහිව 23 වැනිදා දැවැන්ත එකතුවක්!
ජාතික ජන බලවේග ආණ්ඩුව අධිකරණය තමන්ගේ සන්තකයට ගෙන පාලනය කිරීමට දැඩි උත්සාහයක නිරත වන බවත්, ඊට එරෙහිව ශ්රී ලංකා නීතිඥ සංගමය, විනිසුරුවරුන්ගේ සංගමය, ජාත්යන්තර නීතිඥ සංගමය මෙන්ම ආණ්ඩුව නියෝජනය කරන නීතිඥයන් පවා මේ වන විට පෙළගැසී ඇති බවත් සේනසිංහ මහතා ප්රකාශ කළේය.
අභියෝගය සහ ආරාධනය:
අධිකරණයේ ස්වාධීනත්වය සහ ප්රජාතන්ත්රවාදය සුරැකීම වෙනුවෙන් පක්ෂ භේදයකින් තොරව එළඹෙන 23 වැනිදා පස්වරු 4.00 ට කොළඹදී පැවැත්වෙන විරෝධතාවයට එකතු වන ලෙස සියලුම දේශපාලන පක්ෂ නායකයන්ට සහ ජනතාවට සූජීව සේනසිංහ මහතා විවෘත ආරාධනයක් කළේය.
දේශපාලන පිටියේ ප්රබල තීන්දු දෙකක්
මාධ්ය හමුව අවසානයේ අදහස් දැක්වූ සූජීව සේනසිංහ මහතා ඉදිරි දේශපාලන ගමන්මග පිළිබඳව ප්රබල ප්රකාශ දෙකක් සිදු කළේය:
- මධ්යම පළාත් සභා සටනට: ආණ්ඩුව පවසන පරිදි ඔවුන්ට සියයට 50 ක ජනප්රියතාවක් තිබේ නම් ලබන මාසයේ පළාත් සභා මැතිවරණය පවත්වන ලෙසත්, එසේ පැවැත්වුවහොත් තමා මධ්යම පළාතේ මහ ඇමැති ධුරය සඳහා තරග වදින බවත් සපථ කළේය.
- මන්ත්රීධුරයෙන් අස්වීමේ කොන්දේසිය: ජනාධිපතිවරයා ඇතුළු පිරිස රාජ්ය බලය හිතුමනාපයේ හසුරුවන බවත්, 2027 ජනවාරි මාසයේදී විනිසුරුවරුන්ගේ කාලය දීර්ඝ කිරීමට ආණ්ඩුව කටයුතු කළහොත් තමා සප්රමාදව මන්ත්රීධුරයෙන් ඉල්ලා අස්වන බවත් හෙතෙම වැඩිදුරටත් අවධාරණය කළේය.