“ලසන්ත, තාජුඩීන්, පාස්කු පිටුපස සිටි දේශපාලන මෙහෙයුම්කරුවන් රටට හෙළි කරනවා; පළිගැනීම් නෑ, හැබැයි දඬුවම් ස්ථිරයි” – ජනාධිපති
“ජනතාව මර්දනය කරන PTA සහ ඔන්ලයින් පනත් ඉවරයි! සෙංකෝලය උස්සන එක වීරකමක් නෙවෙයි අශිෂ්ටකමක්” – ජනාධිපතිවරයා පාර්ලිමේන්තුවේදී කියයි
“කුඩු-පාතාල දේශපාලන රැකවරණය අවසන්; විමර්ශන නිලධාරීන්ට තර්ජනය කළොත් බලාගෙනයි!” – ජනාධිපතිගෙන් දැඩි අනතුරු ඇඟවීමක්!
පසුගිය කාල වකවානුවල රට තුළ සිදුවූ කිසිදු ම්ලේච්ඡ අපරාධයක් හෝ දූෂණයක් කාලයේ වැලි තලාවෙන් යටපත් වීමට ඉඩ නොතබා, සියලු අපරාධකරුවන් නිසි පරිදි නීතිය ඉදිරියට පමුණුවන බව ජනාධිපති අනුර කුමාර දිසානායක මහතා ඊයේ (25) පාර්ලිමේන්තුවේදී දැඩි ලෙස අවධාරණය කළේය. විෂ මත්ද්රව්ය උවදුර සහ සංවිධානාත්මක අපරාධ මැඬලීම පිළිබඳ සභාව කල් තබන අවස්ථාවේ විවාදයට එක්වෙමින් ජනාධිපතිවරයා මේ බව සඳහන් කළේය.
මෙම විශේෂ දේශනයේදී ජනාධිපතිවරයා විසින් රටේ ඉදිරි ගමන සහ නීතිය ක්රියාත්මක කිරීම සම්බන්ධයෙන් ප්රබල කරුණු කිහිපයක් රට හමුවේ තැබීය.
“දේශපාලන රැකවරණය අවසන්; වින්දිතයන්ට යුක්තිය ඉටු කරනවා”
ලසන්ත වික්රමතුංග, තාජුඩීන් ඝාතන, පාස්කු ප්රහාරය මෙන්ම මාධ්යවේදීන්ට සහ සිවිල් වැසියන්ට එල්ල වූ සුදු වෑන් ප්රහාර පිටුපස සිටි කුඩා රාජ්ය යාන්ත්රණයේ මෙහෙයුම්කරුවන් රටට හෙළිදරව් කරන බව ජනාධිපතිවරයා පැවසීය.
මේවා දේශපාලන කඳවුරක හෝ පවුලක බලය වෙනුවෙන් කළ අපරාධ බවත්, හමුදාවේ හෝ බුද්ධි අංශවල කීර්ති නාමයට කැළලක් කරමින් මීට සම්බන්ධ වූ අයට දඬුවම් දීමට ආණ්ඩුව පැකිළෙන්නේ නැති බවත් ඔහු සඳහන් කළේය.
PTA අහෝසි කෙරේ; ඔන්ලයින් ආරක්ෂණ පනත සංශෝධනය වෙයි!
මහජනතාව දිගු කලක් තිස්සේ ඉල්ලා සිටි ත්රස්තවාදය වැළැක්වීමේ පනත (PTA) මේ වසර තුළදී මුළුමනින්ම අහෝසි කරන බව ජනාධිපතිවරයා මෙහිදී නිල වශයෙන් ප්රකාශ කළේය.
ඒ වෙනුවට මිනිස් අයිතිවාසිකම් සුරැකෙන පරිදි සංවිධානාත්මක අපරාධ වැළැක්වීමේ නව පනතක් නිශ්චිත අර්ථ නිරූපණ සහිතව ගෙන එන බවත්, පසුගිය රජය සමයේ සම්මත කළ ‘ඔන්ලයින් ආරක්ෂණ පනත’ (Online Safety Act) මුළුමනින්ම සංශෝධනය කිරීමට පසුගිය සතියේ කැබිනට් අනුමැතිය හිමිවූ බවත් ඔහු අනාවරණය කළේය.
“විමර්ශන නිලධාරීන්ට අත තියන්න දෙන්නේ නැහැ”
අපරාධ සහ වංචා විමර්ශනය කරන ශානි අබේසේකර, රංග දිසානායක, රවී සෙනෙවිරත්න වැනි නිලධාරීන් අද විපක්ෂයේ සතුරන් බවට පත්ව ඇති බව පෙන්වා දුන් ජනාධිපතිවරයා, පුද්ගලික පළිගැනීම්වලින් තොරව නීතිය ක්රියාත්මක කරන එම නිලධාරීන්ට තර්ජනය කරමින් මෙම ක්රියාවලිය නැවැත්වීමට කිසිවෙකුට ඉඩ නොදෙන බවට සහතික විය.
“රජය බලයට පත්වී දැන් වසර දෙකකට ආසන්නයි. පළිගන්නවා නම් කරන්නේ බලය ගත් මොහොතෙමයි. මහජනතාවගේ දේපොළ හොරකම් කරපු අයට දඬුවම් දීම පොදුජන අපේක්ෂාවක්. අපි කරන්නේ ඒ අපේක්ෂාවට පණ දීමයි.”
පාතාලයට සහ කුඩු ජාවාරමට වැලිසරින් වැට බඳී
බන්ධනාගාර තුළ සිට ක්රියාත්මක වන මත්ද්රව්ය ජාලය අඩපණ කිරීම සඳහා සියලු සන්නිවේදන ජාල බිඳ දැමූ නවීන බන්ධනාගාරයක් වැලිසර ස්ථාපිත කර ඇති බවත්, ප්රධාන අපරාධකරුවන් එහි රැඳවීමට පියවර ගන්නා බවත් ජනාධිපතිවරයා පැවසීය. මේ වන විටත් විදේශයන්හි සැඟව සිටි රතු වරෙන්තුකරුවන් 23ක් ඇතුළු ජාවාරම්කරුවන් 35 දෙනෙකු ලංකාවට ගෙන්වා ඇති බවද ඔහු සඳහන් කළේය.
“කඳුළු ගෑස් – ජල ප්රහාර නැති එකම යුගය මෙයයි”
තමන්ගේ පාලන කාලය තුළ රටේ පොදු ජනතාවගේ අරගලයන්ට එරෙහිව එකදු කඳුළු ගෑස් ප්රහාරයක් හෝ ජල ප්රහාරයක් (Water Cannon) පාවිච්චි කර නොමැති බව පැවසූ ජනාධිපතිවරයා, වත්මන් රජය ප්රජාතන්ත්රවාදය අගයන, පාලකයා ප්රශ්න කිරීමට ජනතාවට අයිතිය දෙන ශිෂ්ටසම්පන්න රාජ්යයක් ගොඩනැගීමට කැපවී සිටින බව ජනාධිපති වරයා කීය.