ලෝක මුගුරු පාද දිනයේදී අනාවරණය වන ගෝලීය සහ දේශීය දත්ත මෙන්න. නිසි කලට මැදිහත් වුවහොත් 100%ක් සුව කළ හැකි බවට වෛද්යවරුන්ගෙන් සහතිකයක්.
උපතින්ම දරුවෙකුගේ පාද ඇතුළු පැත්තට සහ පහළට හැරී පැවතීමේ විකෘතිතා තත්ත්වය හෙවත් ‘මුගුරු පාදය’ (Clubfoot) හේතුවෙන් ලෝකය පුරා මිලියනයකට (ලක්ෂ 10කට) අධික පිරිසක් මේ වන විටත් ස්ථිර ආබාධිත තත්ත්වයෙන් පසුවන බව ජාත්යන්තර සෞඛ්ය සංවිධාන පෙන්වා දෙයි. අදට (ජූනි 03) යෙදෙන ලෝක මුගුරු පාද දිනය (World Clubfoot Day) වෙනුවෙන් නවතම දත්ත විශ්ලේෂණය කරමින් වෛද්ය ක්ෂේත්රය අවධාරණය කරන්නේ, මෙය කිසිසේත්ම මවුපියන් බිය විය යුතු හෝ සමාජයට සැඟවිය යුතු රෝගී තත්ත්වයක් නොවන අතර මුල් අවධියේදීම හඳුනාගතහොත් දරුවා සම්පූර්ණයෙන්ම සුවපත් කළ හැකි බවයි.
ලෝකය පුරා සෑම වසරකම දරුවන් 174,000ත් 200,000ත් අතර ප්රමාණයක් (එනම් සෑම විනාඩි 3කටම එක් දරුවෙකු බැගින්) මුගුරු පාද සහිතව උපත ලබයි.
සංවර්ධිත රටවල දරුවන්ට උපතින්ම මේ සඳහා ප්රතිකාර ලැබුණ ද, අඩු සහ මධ්යම ආදායම් ලබන රටවල (LMICs) උපදින දරුවන්ගෙන් තවමත් ප්රතිකාර සඳහා යොමුවන්නේ 22%ක් වැනි සුළු පිරිසක් පමණි. ඉතිරි 80%කට ආසන්න දරුවන් පිරිස නිසි ප්රතිකාර නොලැබීමෙන් ජීවිත කාලය පුරාම දරුණු ශාරීරික හා මානසික පීඩාවන්ට ලක්වෙති.
ශ්රී ලංකාවේ සෑම වසරකම දරුවන් 400ක් පමණ මුගුරු පාද තත්ත්වය සහිතව උපත ලබයි.
ලිංගභේදය අනුව බලපෑම: මෙරට සිදුකර ඇති වෛද්ය පර්යේෂණ අනුව ගැහැනු දරුවන්ට වඩා පිරිමි දරුවන් අතර මෙම තත්ත්වය බහුලව දක්නට ලැබේ. එය දළ වශයෙන් 2.7 : 1 ක ඉහළ අනුපාතයක් ගන්නා අතර, බලපෑමට ලක්වන දරුවන්ගෙන් 73%ක්ම පිරිමි දරුවන් වීම විශේෂත්වයකි.
දරුවා ඉපදී සති කිහිපයක් ඇතුළත (මුල් මාස කිහිපය තුළ) මෙම සායනික ප්රතිකාර සඳහා යොමු කිරීමෙන් දරුවාගේ පාදය සම්පූර්ණයෙන්ම සාමාන්ය තත්ත්වයට පත් කළ හැකි අතර, ඔවුන්ට අනෙක් සාමාන්ය දරුවන් මෙන් දුව පැන ඇවිදීමට මෙන්ම ක්රීඩා කිරීමටද පූර්ණ හැකියාව ලැබේ.
ලංකාවේ ප්රතිකාර සම්පූර්ණයෙන්ම නොමිලේ
ශ්රී ලංකා සෞඛ්ය අමාත්යාංශය සහ ප්රජා වෛද්යවරුන්ගේ විද්යාලය එක්ව මේ වන විට රට පුරා සිටින පවුල් සෞඛ්ය සේවිකාවන් (PHMs) හරහා ගම් මට්ටමින් උපදින දරුවන් නිරීක්ෂණය කර, මුගුරු පාද සහිත දරුවන්ව කඩිනමින් රෝහල් වෙත යොමු කිරීමේ ක්රමවේදයක් සක්රීය කර ඇත.
කොළඹ රිජ්වේ ආර්යා ළමා රෝහල (LRH), කරාපිටිය ශික්ෂණ රෝහල, මහනුවර ජාතික රෝහල ඇතුළු දිවයිනේ සියලුම ප්රධාන ශික්ෂණ සහ දිස්ත්රික් රෝහල්වල මේ සඳහා වන විශේෂ විකලාංග සායනික ප්රතිකාර සේවා සම්පූර්ණයෙන්ම නොමිලේ රජය විසින් සපයනු ලබයි.