කොළඹ: “ප්රජා ශක්ති” ජාතික වැඩසටහන යනු හුදෙක් රජයේ කාර්යයක් පමණක් නොව, රජය, නිලධාරීන් සහ ජනතාව ඒකාබද්ධ වන සැබෑ ප්රජාතන්ත්රවාදී සාමූහික ප්රයත්නයක් බව අග්රාමාත්ය ආචාර්ය හරිනි අමරසූරිය මහත්මිය ප්රකාශ කරයි. ඇය මේ බව කියා සිටියේ “ගම් දහසක වැඩ දහසක්” ව්යාපෘතිය යටතේ කොළඹ, නාම්පමුණුව වසමේ පැවති පුරන් කුඹුරු අස්වැදීමේ සමාරම්භක උත්සවයට අද (02) සන්නිවේදනය වෙමිනි.
මෙහිදී අග්රාමාත්යතුමිය අවධාරණය කළ ප්රධාන කරුණු 3ක්:
- යැපුම් මානසිකත්වයෙන් මිදීම: අතීතයේ පැවති ව්යාපෘතිවලින් ජනතාව වෙනුවට දේශපාලකයින් සවිබල වූ බවත්, 2024 පරිවර්තනයෙන් පසු ජනතාව යැපුම් මානසිකත්වයෙන් මිදී රට ගොඩනැගීමේ වගකීම තමන් අතට ගෙන ඇති බවත් ඇය පැවසුවාය.
- දේශීය ආර්ථිකය නැංවීම: සෑම ප්රදේශයකටම ආවේණික ආර්ථික රටාවන් හඳුනාගෙන ගම සංවර්ධනය කිරීම මින් අපේක්ෂා කෙරේ.
- ස්වයංපෝෂිත ජීවන රටාව: ගෝලීය අර්බුද හමුවේ රට තුළ නිෂ්පාදනය කළ හැකි දේ මෙරටදීම නිපදවා ආහාර සුරක්ෂිතතාව සහ ශක්තිමත් ආර්ථිකයක් ගොඩනැගීම රජයේ ඉලක්කයයි.
රජය, රාජ්ය නිලධාරීන් සහ ප්රජාව අතර පවතින මනා සහයෝගිතාවය තුළින් දිළිඳුකම තුරන් කර, පොහොසත් රටක් සහ ලස්සන ජීවිතයක් රට වැසියන්ට උරුම කර දිය හැකි බව අග්රාමාත්යතුමිය වැඩිදුරටත් සඳහන් කළාය. මෙම අවස්ථාවට දිස්ත්රික් සම්බන්ධීකරණ කමිටු සභාපති ලක්ෂ්මන් නිපුණආරච්චි මහතා ඇතුළු මහජන නියෝජිතයින් සහ රාජ්ය නිලධාරීන් පිරිසක් එක්ව සිටියහ.