පොල් පැළ ලක්ෂ 05ක් රට පුරා නොමිලේ බෙදා දීමේ කප්තුරු සවිය වැඩ සටහන මෙම මස 09 වැනි ඉරිදා දින පෙරවරු දහයට අම්පාර උහන දී ආරම්භ කිරීමට රජය තීරණය කර තිබේ.මෙම වැඩසටහන යටතේ රටෙහි 2 50 000 ක පවුල් එක්ව අක්කර 7,812 ක නව පොල් වගාවන් ඇති කර ගැනීමට අපේක්ෂිත වන අතර ගමේහි ප්‍රජා ශක්ති කමිටු මගින් තෝරා ගෙන ප්‍රාදේශීය සම්බන්ධීකරණ කමිටු මගින් අනුමත කරන ලද ප්‍රතිලාභීන්ට තම ගෙවතුවල දීම පොල් වගාව සිදු කිරීමට හැකි වනු ඇත.දිළිඳුභාවය අවම කිරීමත් සමඟ රට පුරා පොල් වගාව ප්‍රවර්ධනය කිරීම මෙහි අරමුණයි.ඒ අනුව උතුරු පොල් ත්‍රිකෝණය සඳහා තෝරාගත් යාපනය, කිලිනොච්චිය, මුලතිව්, මන්නාරම සහ වවුනියාව දිස්ත්‍රික්ක පහ හැර, ලංකාවේ අනෙකුත් සියලු දිස්ත්‍රික්ක ආවරණය වන ක්‍රියාත්මක කිරීමට නියමිත ය.පොල් පැළ බෙදාදීමේ සිට අස්වැන්න නෙළන තුරු කාල සීමාව පුරා පොල් වගා කිරිමේ මණ්ඩලයේ ප්‍රාදේශීය නිලධාරීන් හා ප්‍රජා ශක්ති කමිටු නිලධාරීන් එක්ව වැඩසටහන සම්පූ ර් ණයෙන් අධීක්ෂණයට යොදා ගැනීමට නියමිත ය.ඒ සඳහා ග්‍රාමීය සංවර්ධන සමාජ ආරක්ෂණ හා ප්‍රජා සවි බල ගැන්වීම් අමාත්‍යාංශය සහ වැවිලි හා ප්‍රජා යටිතල පහසුකම් අමාත්‍යාංශය එක්ව මෙම ව්‍යාපෘතිය ක්‍රියාත්මක කෙරේ.වැවිලි සහ ප්‍රජා යටිතල පහසුකම් අමාත්‍ය සමන්ත විද්‍යාරත්න සහ ග්‍රාමීය සංවර්ධන සමාජ ආරක්ෂණ සහ ප්‍රජා සවිබල ගැන්වීම් නියෝජ්‍ය අමාත්‍ය වසන්ත පියතිස්ස යන මහත්වරු මෙම වැඩසටහනට නායකත්වය ලබා දීමට නියමිත ය.