බෙංගාල බොක්ක මුහුදු ප්‍රදේශයේ පැවැති ගැඹුරු පීඩන අවපාතය “අර්නබ්” (Arnab) නැමැති සුළි කුණාටුව දක්වා වර්ධනය වී ඇති බවත්, ඒ හේතුවෙන් ඉදිරි දින කිහිපයේදී දිවයිනේ නිරිතදිග ප්‍රදේශ ඇතුළු පළාත් රැසකට වැසි සහ සුළං තත්ත්වයේ සැලකිය යුතු ඉහළ යාමක් අපේක්ෂා කරන බවත් කාලගුණ විද්‍යා දෙපාර්තමේන්තුව විශේෂ නිවේදනයක් නිකුත් කරමින් සඳහන් කරයි.
“අර්නබ්” සුළි කුණාටුවේ ගමන් මඟවර්තමාන තත්ත්වය: ඔක්තෝබර් 26 වන දින පෙ.ව. 8.30 වන විට කන්කසන්තුරයට කිලෝමීටර 1100 ක් පමණ ඊශාන දෙසින් කේන්ද්‍රගතව පැවති මෙම පද්ධතිය, බටහිරට බරව වයඹ දෙසට ගමන් කරමින් පවතී.
ඉදිරි තීව්‍රතාව: ඔක්තෝබර් 26 පස්වරුව වන විට චණ්ඩ සුළි කුණාටුවක් බවටත්, ඔක්තෝබර් 27 වන විට ඉතා චණ්ඩ සුළි කුණාටුවක් බවටත් තවදුරටත් බලගතු වන අතර, ඔක්තෝබර් 28 වන දින පෙ.ව. 11.30 ට පමණ ඉන්දියාවේ ආන්ධ්‍ර ප්‍රදේශ් වෙරළ තීරයෙන් ඉන්දියාවට ඇතුළු වනු ඇතැයි පුරෝකථනය කර ඇත.
තද වැසි සහ ඉහළ වර්ෂාපතනය (මි.මී. 100 ඉක්මවයි)සුළි කුණාටුව සෘජුව ශ්‍රී ලංකාව හරහා නොගියද, එම පද්ධතිය දෙසට ඇදී යන සුළං ප්‍රවාහය හේතුවෙන් දිවයින පුරා වැසි තත්ත්වය වැඩි වේ. අවවාදාත්මක (ඇම්බර්) නිවේදනය: උතුරු, බස්නාහිර, සබරගමුව, වයඹ, මධ්‍යම, දකුණු පළාත් සහ අනුරාධපුර දිස්ත්‍රික්කයේ ඇතැම් ස්ථානවලට මි.මී. 100 ඉක්මවූ තද වැසි ඇති විය හැක. ලැබී ඇති ඉහළම වර්ෂාපතනයන් (පසුගිය පැය 24 තුළ):පුනරින් (කිලිනොච්චිය) – මි.මී. 163 ඉලුප්පෙයික්කඩවයි (මන්නාරම) – මි.මී. 148 තෝල්පුරම් (යාපනය) – මි.මී. 110 මීසායි (යාපනය) – මි.මී. 101
ප්‍රබල අකුණු අනතුර – “සූදානම් වන්න!”උතුරු මැද පළාතට, ත්‍රිකුණාමලය සහ මඩකලපුව දිස්ත්‍රික්ක සඳහා ප්‍රබල අකුණු පිළිබඳ අවවාදාත්මක (ඇම්බර්) නිවේදනයක් නිකුත් කර ඇත. සවස් කාලයේ හෝ රාත්‍රී කාලයේදී ගිගුරුම් සහිත වැසි සමඟ ප්‍රබල අකුණු ඇතිවීමේ වැඩි හැකියාවක් පවතී.
ධීවර හා නාවික ප්‍රජාවට “රතු” අනතුරු ඇඟවීම්!තද සුළං සහ රළු මුහුද: බෙංගාල බොක්කේ උතුරු අක්ෂාංශ 10 ත් 20 ත් සහ නැගෙනහිර දේශාංශ 80 ත් 95 ත් අතර මුහුදු තීරයේ සුළඟේ වේගය පැයට කිලෝමීටර 80-100 දක්වා ඉහළ යා හැකි අතර, මුහුදු රළ මීටර් 3.0 – 4.0 දක්වා ඉහළ යා හැක.
නියෝගය: අදාළ මුහුදු ප්‍රදේශවල නැවත දැනුම් දෙන තුරු ධීවර හා නාවික කටයුතුවලින් මුළුමනින්ම වළකින ලෙසත්, දැනට එම ප්‍රදේශවල සිටින යාත්‍රා වහාම ආරක්ෂිත ස්ථාන වෙත ගමන් කරන ලෙසත් දැඩි ලෙස උපදෙස් දෙනු ලැබේ. වෙරළබඩ සුළං: කොළඹ සිට ගාල්ල, මාතර, හම්බන්තොට, පොතුවිල් හරහා මුලතිව් දක්වා මුහුදු ප්‍රදේශවල සුළඟේ වේගය විටින් විට පැ.කි.මී. 60-65 දක්වා ඉහළ යා හැක.
මහජනතාව සඳහා විශේෂ ආරක්ෂිත උපදෙස්:අකුණු අනතුරු:
අකුණු පවතින අවස්ථාවල එළිමහනේ, ගස් යට, කුඹුරු හෝ විවෘත ජලාශයේ රැඳී නොසිටින්න. ආරක්ෂිත ගොඩනැගිල්ලක් හෝ සංවෘත වාහනයක් තුළ රැඳී සිටින්න.
විදුලි උපකරණ: රැහැන් සහිත දුරකථන සහ විදුලියට සම්බන්ධ කළ විදුලි උපකරණ භාවිතයෙන් වළකින්න. ගස් හා විදුලි රැහැන්: තද සුළං නිසා ගස් සහ විදුලි රැහැන් ඇද වැටීමේ අවදානමක් පවතින බැවින් සැලකිලිමත් වන්න. හදිසි සහාය: යම් ආපදා තත්ත්වයක් හෝ ගැටලුවක් වෙතොත් වහාම 117 හදිසි ඇමතුම් අංකය ඔස්සේ ආපදා කළමනාකරණ මධ්‍යස්ථානය අමතන්න.