ප්‍රමිතියෙන් තොර ගල්අඟුරු ආනයනය කිරීම හේතුවෙන් රටට සිදුවූ අතිවිශාල මූල්‍ය පාඩුව සහ ඒ පිටුපස ඇති “ගල්අඟුරු මාෆියාව” හෙළි කරමින් පාර්ලිමේන්තු මන්ත්‍රී එස්.එම්. මරික්කාර් මහතා විසින් විශේෂ මාධ්‍ය හමුවක් පවත්වන ලදී.
පාර්ලිමේන්තුවේ යටිතල පහසුකම් පිළිබඳ ආංශික අධීක්ෂණ කාරක සභාවේ සභාපතිවරයා ලෙස, විදුලිබල අමාත්‍යාංශයේ අතිරේක ලේකම්වරයාගේ ප්‍රධානත්වයෙන් පත් කරන ලද විශේෂඥ කමිටු වාර්තාව පදනම් කරගනිමින් මෙම තොරතුරු අනාවරණය කෙරිණි.
ප්‍රමිතියෙන් තොර ගල්අඟුරු සැපයීම සහ බාල තත්ත්වය නිසා ලක්විජය බලාගාරයට සහ සමස්ත රටට සිදුවූ සෘජු හා වක්‍ර මූල්‍ය පාඩුව රුපියල් මිලියන 17,965ක් (බිලියන 18කට ආසන්න මුදලක්) බව කමිටු වාර්තාව තහවුරු කරයි.
අතිරේක ගල්අඟුරු පරිභෝජනය (ජනවාරි 01 – සැප්තැම්බර් 15): මිලියන 799යි
නඩත්තු කළමනාකරණ පිරිවැය ඉහළ යාම: මිලියන 80.4යි
අළු ප්‍රතිශතය පාලනය කිරීමේ වියදම: මිලියන 13.1යි
පෞද්ගලික අංශයෙන් අතිරේක විදුලිය මිලදී ගැනීම: මිලියන 8,573යි (මෙගාවොට් 300ක ධාරිතාව නිසි පරිදි උත්පාදනය නොවීම නිසා)
හදිසි මිලදී ගැනීම් යටතේ නැව් 5කින් ගල්අඟුරු මෙට්‍රික් ටොන් ලක්ෂ 3ක් වැඩිපුර ගෙන ඒම: මිලියන 2,284යි
නැවක් පැමිණීම දවස් 5කින් ප්‍රමාද වීම නිසා සිදුවූ අතිරේක පාඩුව: මිලියන 400කට වැඩි ප්‍රමාණයක්
දේශපාලන වගකීම: මෙම ප්‍රසම්පාදන ක්‍රියාවලිය සිදුවන සමයේ විෂයභාර අමාත්‍යවරයා ලෙස කටයුතු කළ, ජනාධිපතිවරයාගේ සමීපතමකු වන කුමාර ජයකොඩි මහතා මෙම මහා පරිමාණ මූල්‍ය වංචාවට සෘජුව වගකිව යුතු බව මන්ත්‍රීවරයා අවධාරණය කළේය.
ආණ්ඩුවේ මැදිහත්වීම: මීට පෙර පාර්ලිමේන්තුවේදී විශ්වාසභංගයක් ගෙන ආ අවස්ථාවේදී පවා ආණ්ඩුව තම බහුතර බලය (159 වගන්තිය) භාවිතා කරමින් අමාත්‍යවරයාව ආරක්ෂා කළද, පසුව මහජන විරෝධය හමුවේ ඔහුට ඉල්ලා අස්වීමට සිදුවිය.
මෙම ගල්අඟුරු මාෆියාව නිසා රටට සිදුවූ රුපියල් බිලියන 17.9ක පාඩුව පියවා ගැනීම සඳහා වත්මන් ආණ්ඩුව ජනතාව මත දැඩි ආර්ථික බරක් පටවා ඇති බව මන්ත්‍රීවරයා පෙන්වා දෙයි:
ඉන්ධන මිල ඉහළ යාම: පෙට්‍රල් ලීටරයක මිල රුපියල් 411 දක්වා ඉහළ නැංවීම.
විදුලි බිල වැඩිවීම: “තුනෙන් එකකින් විදුලි බිල අඩු කරනවා” යැයි පැවසූ ආණ්ඩුව, මේ වන විට විදුලි බිල සියයට 150කින් ඉහළ දමා තිබීම.
භාණ්ඩ මිල ඉහළ යාම: තෙල් සහ විදුලි බිල වැඩිවීමත් සමඟ බස් ගාස්තු, ආහාර ද්‍රව්‍ය ඇතුළු සමස්ත ජීවන වියදම ඉහළ ගොස් ජනතාව අන්ත අසරණ වී තිබීම.
“රටේ ජනතාවගේ රීරි මාංශ උරා බොනවා වගේ ආණ්ඩුව බදුවලින් ජනතාව මිරිකලා තිබෙනවා. මේ සියලු බඩු මිල වැඩිවීමට, තෙල් මිල වැඩිවීමට සහ විදුලි බිල වැඩිවීමට මුල මේ මහා පරිමාණ ගල්අඟුරු හොරකමයි.” යැයි මන්ත්‍රීවරයා වැඩිදුරටත් සඳහන් කළේය.
මෙම හෙළිදරව්වට අදාළ සම්පූර්ණ වාර්තාව ඉදිරියේදී පාර්ලිමේන්තුවට ඉදිරිපත් කිරීමට නියමිත අතර, වරදකරුවන්ට එරෙහිව ගනු ලබන ක්‍රියාමාර්ග සම්බන්ධයෙන් සමගි ජන බලවේගය දැඩි අවධානයෙන් බලා සිටින බව ප්‍රකාශ කර ඇත.