ප්ලාස්ටික් ගිලීම සහ සංචාරක හෝටල්වල ආලෝක ධාරා නිසා කැස්බෑ ගහණය සීඝ්රයෙන් පහතට
අදට යෙදෙන ලෝක මුහුදු කැස්බෑවුන්ගේ දිනයේ තේමාව: “වෙරළ පිරිසිදු කරන්න යන්න”
ලෝකයේ ජීවත්වන අතිශය දුර්ලභ සහ වඳවීමේ තර්ජනයට මුහුණ පා සිටින මුහුදු කැස්බෑ විශේෂ 07ක් අතුරින් විශේෂ 05ක්ම (ගල් කැස්බෑවා, දාර කැස්බෑවා, බටු කැස්බෑවා, පොතු කැස්බෑවා සහ පෙරුම්කැස්බෑවා) බිත්තර දැමීම සඳහා ශ්රී ලංකාවේ දකුණු සහ බස්නාහිර වෙරළ තීරයන් තෝරා ගැනීම රටක් ලෙස අප ලබන සුවිශේෂී භාග්යයක් වුවද, මිනිස් ක්රියාකාරකම් හේතුවෙන් වර්තමානයේ මෙම සතුන්ගේ ජීවිත බරපතළ අවදානමකට ලක්ව ඇතැයි පරිසර බලධාරීන් අනතුරු අඟවයි.
අදට (ජුනි 16) යෙදී තිබෙන ‘ලෝක මුහුදු කැස්බෑවුන්ගේ දිනය’ වෙනුවෙන් මෙවර ප්රකාශයට පත් කර ඇති තේමාව වන්නේ “වෙරළ පිරිසිදු කරන්න යන්න” යන්නයි.
මරණීය තර්ජන 04ක්
වනජීවී සහ සමුද්රීය අංශ පෙන්වා දෙන්නේ සාගර පද්ධතියේ සමතුලිතතාවය රැකගැනීමට උපකාරී වන මෙම අහිංසක සතුන් මිනිසාගේ අත්තනෝමතික වැඩපිළිවෙළවල් හේතුවෙන් සීඝ්රයෙන් වඳවෙමින් පවතින බවයි. විශේෂයෙන්ම:
මුහුදට මුදාහරින සහ සාගර පතුලේ සිරවී තිබෙන ප්ලාස්ටික් හා පොලිතින් ආහාර ලෙස අනුභව කිරීමෙන් සතුන් ඛේදජනක ලෙස මියයෑම.
නොසැලකිලිමත් ලෙස එළා ඇති ධීවර දැල්වල පැටලීමෙන් සිදුවන අනතුරු.
වෙරළට පැමිණ දමන බිත්තර ජාවාරම්කරුවන් විසින් දිගින් දිගටම කොල්ලකෑම.
වෙරළාශ්රිත සංචාරක හෝටල්වලින් මුදාහරින අධික ආලෝක ධාරාවන් (Light Pollution) හේතුවෙන් කැස්බෑවුන් බිත්තර දැමීමට වෙරළට පැමිණීම ප්රතික්ෂේප කිරීම සහ මංමුළා වීම.
රාජ්ය ආයතන සීරුවෙන්
නාවික කටයුතු සහ අනෙකුත් මානව බලපෑම් හමුවේ මෙම සත්ත්ව ප්රජාව රැකගැනීම සඳහා පරිසර අමාත්යාංශය, වෙරළ සම්පත් සහ වෙරළ කළමනාකරණ දෙපාර්තමේන්තුව මෙන්ම සමුද්රීය පරිසර ආරක්ෂණ අධිකාරිය (MEPA) එක්ව පසුගිය කාල සීමාව පුරා සුවිශේෂී වැඩසටහන් රැසක් දියත් කර තිබේ. උන්ගේ ගොඩබිම් සහ මුහුදු පත්ලේ වාසභූමි ආරක්ෂා කිරීම සඳහා නීතිමය සහ ප්රායෝගික පියවර ගැනීම මේ යටතේ සිදු කෙරේ.
“මහජනතාවගේ මැදිහත්වීම නැතුව මේක කරන්න බෑ”
වනජීවී සංරක්ෂණ දෙපාර්තමේන්තුව සහ ස්වේච්ඡා සංවිධාන එක්ව කැස්බෑ බිත්තර සුරැකීමට උපරිම උත්සාහයක් දැරුවද, මහජනතාවගේ සහ ධීවර ප්රජාවගේ සෘජු දායකත්වයකින් තොරව මෙම සතුන් වඳවී යාම වැළැක්විය නොහැකි බව පරිසර ක්රියාකාරීහු අවධාරණය කරති.
එබැවින්, මෙරට ජෛව විවිධත්වයේ අසිරිමත් උරුමයක් බඳු වූ මෙම “මුහුදු අමුත්තන්” මතු පරපුර උදෙසා රැක ගැනීමට නම්, අපේ වෙරළ තීරයන් පිරිසිදුව තබා ගැනීමට අද දවසේ සමස්ත ලාංකේය සමාජයම දැඩි ලෙස අධිෂ්ඨාන කරගත යුතු බව මෙම දිනයේදී විශේෂයෙන් සිහිපත් කර සිටී.