මානසික සෞඛ්‍ය ගැටලු ඇතිවීමට බලපාන පසුබිම් හඳුනාගෙන ඒවාට විසඳුම් සෙවීම වැදගත් – අමාත්‍ය සරෝජා සාවිත්‍රි පෝල්රාජ්
2026 ලෝක මානසික සෞඛ්‍ය දිනයට සමගාමීව සංවිධාන කළ සැමරුම් වැඩසටහනක් අද (09) කාන්තා සහ ළමා කටයුතු අමාත්‍ය සරෝජා සාවිත්‍රි පෝල්රාජ් මහත්මියගේ ප්‍රධානත්වයෙන් බත්තරමුල්ල, සුහුරුපාය පරිශ්‍රයේදී පැවැත්විණි.
කාන්තා සහ ළමා කටයුතු අමාත්‍යාංශය සහ ඊට අනුබද්ධ ශ්‍රී ලංකා කාන්තා කාර්යාංශය විසින් මෙම වැඩසටහන සංවිධාන කර තිබිණි.
මෙවර ලෝක මානසික සෞඛ්‍ය දිනයේ තේමාව වූයේ “සැබෑ අත්දැකීම්වලට සවන් දෙමු, සැබෑ හඬින්, යථාර්ථවාදී වෙනසක්!” යන්නයි.
මානසික සෞඛ්‍යය වෛද්‍ය විද්‍යාවට පමණක් සීමා කළ නොහැකියි
මෙම අවස්ථාව අමතමින් අමාත්‍ය සරෝජා සාවිත්‍රි පෝල්රාජ් මහත්මිය සඳහන් කළේ මානසික සෞඛ්‍ය සංවර්ධනය වෛද්‍ය විද්‍යාත්මක කාරණයක් ලෙස පමණක් සලකා කටයුතු කිරීම ප්‍රමාණවත් නොවන බවයි. ඒ වෙනුවට එය සමාජ විද්‍යාත්මක දෘෂ්ටිකෝණයකින් ද විග්‍රහ කළ යුතු බව ඇය පෙන්වා දුන්නාය.
විශාල ජන සමූහයක් අතර ජීවත් වුවද පුද්ගලයන් එකිනෙකාගෙන් හුදෙකලාව ජීවත් වීම අද වන විට පොදු තත්ත්වයක් බවට පත්ව ඇති බව ද අමාත්‍යවරිය සඳහන් කළාය.
පවුල් සංස්ථාව තුළ මව, පියා සහ දරුවන් එකම පවුලක් ලෙස සිතමින් කටයුතු කිරීම යළි ආරම්භ කළ යුතු බව පෙන්වා දුන් ඇය, එම සැබෑ සමාජ ගැටලු ආමන්ත්‍රණය කරමින් රජයේ උපදේශන සේවාව මෙහෙයවිය යුතු බව ද අවධාරණය කළාය.
ගැටලු ඇතිවීමට බලපාන හේතු හඳුනාගැනීම වැදගත්
ගැටලුවක් ඇති වූ පසු එය සුවපත් කිරීමට පමණක් අවධානය යොමු කිරීම වෙනුවට, එවැනි ගැටලු ඇතිවීමට බලපාන පසුබිම් හඳුනාගෙන ඒවාට විසඳුම් ලබාදීමට කටයුතු කිරීම අවශ්‍ය බව ද අමාත්‍යවරිය පෙන්වා දුන්නාය.
ඒ අනුව, මානසික සෞඛ්‍ය ගැටලු සඳහා ප්‍රතිචාර දැක්වීමේදී පුද්ගලයාගේ තත්ත්වය පමණක් නොව, ඔහු හෝ ඇය ජීවත් වන පවුල් පරිසරය සහ සමාජීය පසුබිම පිළිබඳව ද අවධානය යොමු කිරීමේ වැදගත්කම ඇය අවධාරණය කළාය.
උපදේශන නිලධාරීන් සඳහා රංග චිකිත්සක පුහුණු සැසියක්
මෙම සැමරුම් වැඩසටහනට සමගාමීව උපදේශන නිලධාරීන් සහ අනෙකුත් පාර්ශ්වකරුවන් වෙනුවෙන් විශේෂ රංග චිකිත්සක අභ්‍යාස පුහුණු සැසියක් ද පැවැත්විණි.
උපදේශන සේවාව සමඟ සෘජුව කටයුතු කරන නිලධාරීන්ගේ වෘත්තීය කුසලතා වර්ධනය කිරීම සහ මානසික සෞඛ්‍යය සම්බන්ධයෙන් වඩාත් ඵලදායී සේවාවක් සැපයීම සඳහා මෙවැනි පුහුණු වැඩසටහන් වැදගත් වේ.
රාජ්‍ය ආයතන රැසක නියෝජිතයෝ එක්වෙති
මෙම අවස්ථාවට කාන්තා සහ ළමා කටයුතු අමාත්‍යාංශයේ ලේකම් තරංගනී වික්‍රමසිංහ මහත්මිය, ශ්‍රී ලංකා කාන්තා කාර්යාංශයේ නියෝජ්‍ය අධ්‍යක්ෂවරුන් ඇතුළු නිලධාරීහු සහභාගී වූහ.
එමෙන්ම ශ්‍රී ලංකා යුද්ධ හමුදාව, ශ්‍රී ලංකා පොලිසිය ඇතුළු උපදේශන සේවාව සමඟ සෘජුව කටයුතු කරන ආයතනවල නිලධාරීන්, කාන්තා සහ ළමා කටයුතු අමාත්‍යාංශයේ උපදේශන නිලධාරීන්, උපදේශන ක්ෂේත්‍ර සහකාර නිලධාරීන් සහ පාසල් සිසු සිසුවියන් ද මෙම අවස්ථාවට එක්ව සිටියහ.
මානසික සෞඛ්‍යය පිළිබඳ සමාජ අවබෝධය පුළුල් කිරීම, පවුල් හා සමාජීය ගැටලු හඳුනාගැනීම සහ උපදේශන සේවාව වඩාත් ඵලදායී ලෙස ක්‍රියාත්මක කිරීමේ වැදගත්කම මෙම වැඩසටහන මඟින් අවධාරණය කෙරිණි.