මෙරට පාසල් පද්ධතිය තුළ දීර්ඝ කාලයක් තිස්සේ සාකච්ඡාවට බඳුන් වූ, බොහෝ මතභේදවලට තුඩු දුන් දරුවන්ට දඬුවම් කිරීමේ ප්රශ්නයට විසඳුම් සොයමින්, අධ්යාපන අමාත්යාංශය විසින් අද (02) විශේෂ චක්රලේඛයක් නිකුත් කරමින් පාසල් දරුවන්ට ශාරීරික හා මානසික පීඩා සිදු කිරීම මින් ඉදිරියට සම්පූර්ණයෙන් තහනම් කර තිබේ.
මෙම දැඩි නියෝගය නිකුත් කිරීමට පදනම් වූයේ මෑතකදී ශ්රේෂ්ඨාධිකරණය ලබා දුන් ඓතිහාසික තීන්දුවකි. එම තීන්දුවෙන් අවධාරණය කෙරුණේ, “විනය ආරක්ෂා කිරීම” යන කරුණ මුවාවෙන් දරුවන්ට ශාරීරික හෝ මානසික හානියක් සිදු කිරීම මූලික අයිතිවාසිකම් උල්ලංඝනය කිරීමක් වන බවයි. මෙම තීන්දුව මත පදනම්ව අධ්යාපන අමාත්යාංශය මෙම නව උපදෙස් මාලාව නිකුත් කර ඇත.
ශාරීරික දඬුවම් සම්පූර්ණයෙන් තහනම්: කිසිදු මට්ටමක, කවර ආකාරයක හෝ ශාරීරික දඬුවම් (උදා: වේවැලෙන් තැලීම, කනෙන් ඇදීම, අව්වේ සිටුවීම, බිම දණගැස්වීම) පැමිණවීම තවදුරටත් පිළිගත නොහැකි, නීති විරෝධී ක්රියාවකි.
සිසුන්ගේ හැසිරීම් පාලනය සඳහා දඬුවම් වෙනුවට, ධනාත්මක මැදිහත්වීම්, උපදේශනය සහ මඟපෙන්වීම් ලබා දීම අනිවාර්ය කර ඇත.දරුවාගේ මනසට පීඩා වන අයුරින් අපහාසාත්මක වචන භාවිතය, ලැජ්ජාවට පත් කිරීම, හුදකලා කිරීම වැනි මානසික හිංසනයන් ද මෙම තහනමට ඇතුළත් වේ.
මෙම චක්රලේඛය උල්ලංඝනය කරමින් කටයුතු කරන ඕනෑම තැනැත්තෙකුට එරෙහිව තරාතිරම නොබලා නීතිය දැඩිව ක්රියාත්මක කරන බව අධ්යාපන අමාත්යාංශය අවධාරණය කරයි. ඒ අනුව, වැරදිකරුවන්ට එරෙහිව විනයානුකූල පියවර මෙන්ම අපරාධ නීතිය යටතේ නඩු පැවරීමේ හැකියාව ද පවතී.
ඔවුන් මෙම පියවර සාදරයෙන් පිළිගන්නා අතර, මෙය දරුවන්ගේ අභිමානය සුරැකෙන, බියෙන් තොර ඉගෙනුම් පරිසරයක් නිර්මාණය කිරීමේ වැදගත් සන්ධිස්ථානයක් ලෙස සලකයි. “මෙය දරුවන්ගේ මානසික සෞඛ්යයට සහ යහපැවැත්මට ධනාත්මක ලෙස බලපානු ඇත,” යැයි ළමා අයිතිවාසිකම් ක්රියාකාරිකයෙක් පැවසීය.
සමහර ගුරු සංගම් මෙම තීරණයට යම් විරෝධයක් පළ කර ඇති අතර, ඔවුන් පවසන්නේ මෙය සිසුන්ගේ විනය තවදුරටත් පිරිහීමට හේතු විය හැකි බවයි. “දඬුවම් නොමැතිව විනය පාලනය කිරීම ඉතා අපහසුයි. මෙම චක්රලේඛය ක්රියාත්මක කිරීමේදී ප්රායෝගික ගැටලු මතු විය හැකියි,” යැයි ගුරු සංගම් නියෝජිතයෙක් ප්රකාශ කළේ ය.