සාම්ප්රදායික වෛද්ය විද්යාව පිළිබඳ දෙවන ගෝලීය සමුළුව සාර්ථකව අවසන්: බටහිර සහ දේශීය වෛද්ය ක්රම ඒකාබද්ධ කිරීමට ශ්රී ලංකාවෙන් නව මාවතක්
නවදිල්ලිය: ලෝක සෞඛ්ය සංවිධානය (WHO) සහ ඉන්දීය රජයේ ආයුෂ් අමාත්යාංශය ඒකාබද්ධව සංවිධානය කළ සාම්ප්රදායික වෛද්ය විද්යාව පිළිබඳ දෙවන ගෝලීය සමුළුව ඉන්දියාවේ නවදිල්ලි නුවරදී සාර්ථකව නිමාවට පත් විය. රටවල් 100කට අධික සංඛ්යාවක නියෝජිතයන්ගේ සහභාගීත්වයෙන් පැවැති මෙම සමුළුවේදී, සාම්ප්රදායික වෛද්ය ක්රම නවීන සෞඛ්ය සේවාවන් සමඟ ඒකාබද්ධ කිරීමේ වැදගත්කම අවධාරණය කෙරිණි.
“ආරෝග්යා” මධ්යස්ථාන හරහා නව විප්ලවයක්
සමුළුවේ අවසන් සැසිවාරය අමතමින් සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතා ප්රකාශ කළේ, ශ්රී ලංකාව පුරා පිහිටුවනු ලබන “ආරෝග්යා” ප්රාථමික සෞඛ්ය සේවා මධ්යස්ථාන තුළ බටහිර සහ සාම්ප්රදායික වෛද්ය විද්යාවන් ඒකාබද්ධ කර ක්රියාත්මක කිරීමට රජය පියවර ගන්නා බවයි. මෙමඟින් සංස්කෘතික උරුමයන් සහ විද්යාත්මක ප්රමිතීන් යන දෙකටම ගරු කරමින් රෝගීන්ට වඩාත් ගුණාත්මක සේවාවක් සැපයීමට අපේක්ෂා කෙරේ.
වසර 5000ක අභිමානවත් උරුමය
ශ්රී ලංකාවේ සාම්ප්රදායික සෞඛ්ය සේවාව වසර 5000ක් පමණ පැරණි ඉතිහාසයකට හිමිකම් කියන බවත්, එය “වෙද පරම්පරාව” ලෙස හැඳින්වෙන ආවේණික සම්ප්රදායන් මත පදනම්ව පරම්පරාවෙන් පරම්පරාවට පැවත එන බවත් අමාත්යවරයා මෙහිදී පෙන්වා දුන්නේය. ශ්රී ලාංකික ජනගහනයෙන් සැලකිය යුතු පිරිසක් සුළු රෝගාබාධ සඳහා පළමු තේරීම ලෙස අදටත් සාම්ප්රදායික වෛද්ය ක්රම භාවිතා කරන බැවින්, ජාතික සෞඛ්ය ප්රතිපත්තියට මෙය තවදුරටත් ඇතුළත් කිරීමට කටයුතු කරන බවද ඔහු සඳහන් කළේය.
ලෝක සෞඛ්ය සංවිධානයේ නව උපායමාර්ගය
2025-2034 කාලය සඳහා වන ලෝක සෞඛ්ය සංවිධානයේ ගෝලීය සාම්ප්රදායික වෛද්ය උපායමාර්ගය අනුගමනය කිරීමට ශ්රී ලංකාව කැපවී සිටියි. ශක්තිමත් සාක්ෂි, වඩා හොඳ නියාමනය සහ ප්රජා සහභාගීත්වය මත පදනම් වූ මෙම වැඩපිළිවෙළ හරහා සාම්ප්රදායික දැනුම නූතන පර්යේෂණ සමඟ මුසු කිරීමට පියවර ගැනේ.
ශ්රී ලංකාවේ වෘත්තීය ශක්තිය
දැනට ශ්රී ලංකාව තුළ ලියාපදිංචි ආයුර්වේද, සිද්ධ සහ යුනානි වෛද්ය නිලධාරීන් 2,363ක් සේවය කරන අතර, සාම්ප්රදායික වෛද්ය වෘත්තිකයන් 22,000ක් දිවයින පුරා විසිරී සිටිති. මෙම සමස්ත පද්ධතියම 1961 අංක 31 දරන ආයුර්වේද පනත යටතේ ආයතනගත කර ඇති අතර ආයුර්වේද දෙපාර්තමේන්තුව මෙහි කේන්ද්රීය ආයතනය ලෙස කටයුතු කරයි.
සමුළුවට සහභාගී වූ දූත පිරිස
මෙම තෙදින සමුළුව සඳහා ශ්රී ලංකාව නියෝජනය කරමින් සෞඛ්ය අමාත්යවරයාට අමතරව පහත නිලධාරීහු සහභාගී වූහ:
- සෞඛ්ය හා ජනමාධ්ය අමාත්යාංශයේ ලේකම් විශේෂඥ වෛද්ය අනිල් ජාසිංහ
- ආයුර්වේද කොමසාරිස් ජනරාල් ඒ. එම්. ජී. එන්. දීප්ති සුමනසේන
- ආයුර්වේද වෛද්ය ආචාර්ය සුරංගි සංජීවනී පෙරේරා
journalist Nuwan Prasanna Sumanarathna with journalist Yohan Rasindu Uthpala