ශ්‍රී ලංකාවේ ප්‍රමුඛතම ජාතික තාක්ෂණ ප්‍රදර්ශනය සහ දකුණු ආසියාවේ දීර්ඝතම කාලයක් පුරා පැවැත්වෙන ICT ප්‍රදර්ශනය වන INFOTEL 2025 , අද ( 7 වන දින) කොළඹ BMICH හිදී ආරම්භ වූ අතර එය නොවැම්බර් 9 වන දින දක්වා පැවැත්වේ.නවෝත්පාදන, තාක්‍ෂණය සහ ඩිජිටල් දියුණුව ප්‍රදර්ශනය කිරීම සඳහා ජාතික වේදිකාවක් ලෙස දැවැන්ත කාර්‍යක් ඉටු කරන මෙම ප්‍රදර්ශණයට ඩිජිටල් ආර්ථික අමාත්‍යාංශය ද එක් වූ අතර එහි ප්‍රධාන ආරාධිත අමුත්තා ලෙස සහභාගී වූ ගරු, ඩිජිටල් ආර්ථික නියෝජ්‍ය අමාත්‍ය එරංග වීරරත්න මහතා, පුද්ගලික පරිගණකකරණයේ ආරම්භක අවධියේ සිට අද දක්වා, වඩාත් සම්බන්ධිත, දත්ත මත පදනම් වූ යුගයක් කරා ශ්‍රී ලංකාවේ ඩිජිටල් පරිණාමය හැඩගැස්වීමේදී 1992 සිට INFOTEL ඉටු කළ දැවැන්ත කාර්යභාර්‍ය සම්බන්ධයෙන් සිය අදහස් එක් කළේය.2030 වන විට ඇමරිකානු ඩොලර් බිලියන 15 ක ඩිජිටල් ආර්ථිකයක් ගොඩනැගීමේ අමාත්‍යාංශයේ දැක්මට සමගාමීව නවෝත්පාදනය, රැකියා නිර්මාණය සහ ගෝලීය තරඟකාරිත්වය මෙහෙයවීමේදී INFOTEL වැනි වැඩසටහන් ප්‍රමුඛ කාර්‍යක් ඉටුකරමින් තිබෙන බවත් ඔහු තවදුරටත් සඳහන් කළේය.